ఉక్రెయిన్‌కి సైనిక సహాయాన్ని నిలిపివేసిన అమెరికా

అమెరికా అధ్యక్షుడు డొనాల్డ్ ట్రంప్ ఉక్రెయిన్ అధ్యక్షుడు జెలెన్స్కీకి గట్టి షాక్ ఇచ్చారు. ఉక్రెయిన్కు సైనిక సాయం నిలిపివేస్తూ ఆదేశాలు జారీ చేశారు. అంతేకాదు రష్యాతో శాంతి చర్చల్లో పాల్గొనాలని జెలెన్స్కీపై ఒత్తిడి తీసుకొస్తున్నారు. ఓవల్ ఆఫీస్లో ఉక్రెయిన్ అధ్యక్షుడు జెలెన్స్కీకి, ట్రంప్నకు మధ్య వాడివేడి చర్చ జరిగిన తర్వాత ట్రంప్ ఈ కీలక నిర్ణయం తీసుకోవడం గమనార్హం.

కాగా, నిర్ణయాన్ని ఉక్రెయిన్ ప్రభుత్వం తీవ్రంగా ఖండించింది. అగ్రరాజ్యం తమకు వ్యతిరేకంగా తీసుకుంటున్న చర్యలు క్రమంగా తమ దేశాన్ని రష్యాకు లొంగిపోయేలా చేయాలనే ఉద్దేశంతో చేస్తున్నట్టు ఉన్నాయని ఆ దేశ పార్లమెంటరీ విదేశీ వ్యవహారాల కమిటీ చీఫ్ మెరెజ్‌కో ఆరోపించారు. 

ఇటీవల అమెరికా అధ్యక్షుడు ట్రంప్, ఉక్రెయిన్ అధ్యక్షుడు జెలెన్‌స్కీకి మధ్య వాగ్వాదం నెలకొన్న నేపథ్యంలో కీవ్‌పై ఒత్తిడి తీసుకురావడానికే ట్రంప్ ఈ నిర్ణయం తీసుకున్నారని యూరోపియన్ దేశాలు ఆరోపించాయి. ఈ నిర్ణయం వల్ల ఉక్రెయిన్‌కు ఇప్పటికే అందుబాటులో ఉన్న వందల మిలియన్ డాలర్ల విలువైన ఆయుధాలపై ప్రభావం పడనుందని ది న్యూయార్క్ టైమ్స్ వెల్లడించింది.

గత కొన్నేళ్లుగా సాగుతున్న ఈ యుద్ధాన్ని ఆపే ప్రయత్నంలో భాగంగానే ఉక్రెయిన్‌కి సైనిక సహాయాన్ని తాజాగా అమెరికా ప్రభుత్వం నిలిపివేసింది. గత శుక్రవారం జెలెన్‌స్కీ శ్వేతసౌథంలో ట్రంప్‌తో జరిపిన సమావేశంలోనే ట్రంప్‌ యుద్ధాన్ని ఆపమని సూచించారు. అయితే ట్రంప్‌ మాట పెడచెవినపెట్టి రష్యాతో యుద్ధానికి మద్దతు ఇవ్వమని జెలెన్‌స్కీ ట్రంప్‌ని కోరారు. 

అయితే ఆ సమయంలోనే జెలెన్‌స్కీపై ట్రంప్‌ మండిపడ్డారు. చేయి చేసుకున్నంత పని చేశారు. వీరిరువురు సమావేశం అయిన రెండు రోజుల అనంతరం సైనిక సహాయాన్ని నిలిపివేయాలని ట్రంప్‌ సోమవారం ఆదేశించడం గమనార్హం. రష్యాతో యుద్ధానికి ముగింపు పలికి, శాంతి చర్చలకు జెలెన్‌స్కీ సిద్ధమయ్యేంతవరకు తన సైనిక సహాయాన్ని నిలిపివేయడానికి ట్రంప్‌ సిద్ధంగా ఉన్నట్లు వైటస్‌ హౌస్‌ అధికారులు తెలిపారు. 

దాదాపు ఒక బిలియన్‌ డాలర్లు విలువ చేసే ఆయుధాలు మందుగుండు సామాగ్రిని ట్రంప్‌ ఉక్రెయిన్‌కి నిలిపివేసినట్లు మీడియా వర్గాలు పేర్కొన్నాయి. “రష్యా, ఉక్రెయిన్పై యుద్ధం మొదలుపెట్టి ఇప్పటికే 3 ఏళ్లు గడిచిపోయింది. ఈ నేపథ్యంలో ఈ యుద్ధాన్ని ఓ శాంతి ఒప్పందం ద్వారా ముగించాలని ట్రంప్ భావిస్తున్నారు. అందుకే ఈ లక్ష్యానికి జెలెన్స్కీ కట్టుబడి ఉండాలని ట్రంప్ కోరుకుంటున్నారు. ఈ నేపథ్యంలోనే ఉక్రెయిన్కు తాత్కాలికంగా సైనిక సాయం నిలిపివేశారు” అని  వైట్హౌస్ అధికారి ఒకరు తెలిపారు. అంతకు ముందు రష్యాతో యుద్ధం ముగింపు ఇంకా సుదూర తీరంలోనే ఉందని జెలెన్‌స్కీ తెలిపారు. అప్పటిదాకా అమెరికా సహకారం తమకు అందుతుందనే ఆశాభావం వ్యక్తం చేశారు. ఆ దేశంతో డీల్‌కు తాను సిద్ధమేనని, ట్రంప్‌తో భేటీకి సిద్ధంగానే ఉన్నానని చెప్పారు. ఇప్పటిదాకా అమెరికా అందించిన సాయంపై ఉక్రెయిన్ ప్రజలు ఎల్లప్పుడూ రుణపడి ఉంటారని పేర్కొన్నారు.