ఎస్‌ఎల్‌బీసీ టన్నెల్‌ వద్ద ప్రమాదంపై \ముఖ్యమంత్రి రేవంత్‌రెడ్డి దిగ్భ్రాంతి వ్యక్తం చేశారు. జిల్లా కలెక్టర్, ఎస్పీ, అగ్నిమాపక శాఖ, హైడ్రా, ఇరిగేషన్ విభాగం అధికారులు వెంటనే అక్కడికి చేరుకొని సహాయక చర్యలు అందించాలని సీఎంఆదేశించారు.  ముఖ్యమంత్రి ఆదేశాలతో ఇరిగేషన్ శాఖ మంత్రి ఉత్తమ్ కుమార్ రెడ్డి, ఇరిగేషన్ సలహాదారు ఆదిత్య నాథ్ దాస్, ఇరిగేషన్ అధికారులు ప్రత్యేక హెలీకాప్టర్‌లో ప్రమాదం జరిగిన ప్రాంతానికి బయలుదేరి వెళ్లారు. నల్లగొండ జిల్లాకు సాగు, తాగు నీరందించేందుకు శ్రీశైలం ఎడమగట్టు కాలువ సొరంగం ప్రాజెక్టును రూపొందించారు.

2005లో ఎస్‌ఎల్‌బీసీ ప్రాజెక్టుకు నాటి వైఎస్సార్‌ ప్రభుత్వం రూ.2,200 కోట్లతో పరిపాలన అనుమతులు జారీ చేసింది. రూ.1925 కోట్లతో సుమారు 60 నెలల్లో పూర్తి చేయాలని నిర్మాణ సంస్థ పనులకు ఒప్పుకుంది. శ్రీశైలం జలాశయం నుంచి నల్లగొండ జిల్లాకు 30టీఎంసీల కృష్ణా జలాలను తరలించాలన్నది ఈ ప్రాజెక్టు లక్ష్యం.

టన్నెల్‌ బోరింగ్‌ మిషన్‌తో సొరంగం తవ్వకాలు చేపట్టగా సాంకేతిక సమస్యలు, వరద సమస్యలతో పనులు ఆగుతూ వచ్చాయి. బీఆర్‌ఎస్‌ ప్రభుత్వ హాయంలో టన్నెల్‌ బోరింగ్‌ మిషన్‌ మరమ్మతులకు గురవ్వడం, నిధుల కేటాయింపులు లేకపోవడంతో సొరంగం ప్రాజెక్టు పనులు 2019 డిసెంబర్‌ నుంచి మూలపడ్డాయి. అయితే నల్లగొండ మంత్రుల చొరవతో తాజాగా  పనులు మళ్లీ మొదలయ్యాయి.

ఇప్పటివరకు ప్రభుత్వాలు ఆరుసార్లు ఈ ప్రాజెక్టు పనుల గడువును పొడిగించాయి. తాజా గడువు కూడా జూన్‌ 2026 వరకు ఉంది. 2017లో ఈ ప్రాజెక్టు అంచనాలను రూ.3,152.72 కోట్లకు పెంచగా, ఈ మధ్యే మరోసారి 4,637 కోట్లకు పెంచారు. ఈ ప్రాజెక్టులో ఇప్పటివరకు రూ.2,646 కోట్లు ఖర్చు చేశారు.