ఎట్టకేలకు కంగన ‘ఎమర్జెన్సీ’ జనవరి 17న విడుదల

స్వీయ దర్శకత్వంలో బాలీవుడ్ నటి, బిజెపి ఎంపీ కంగనా రనౌత్‌ నటించిన ఎమర్జెన్సీ చిత్రం విడుదలకు ముందే పలు వివాదాలు, న్యాయసంబంధ చిక్కులను అధిగమించి వాయిదా పడుతూ వస్తోంది.  ఆ సినిమా ఎట్టకేలకు కొత్త రిలీజ్​ డేట్​ను ఖరారు చేసుకుంది. ఈ విషయాన్ని కంగనా సోషల్​ మీడియాలో పోస్ట్​ చేశారు. సినిమా వచ్చే ఏడాది 2025 జనవరి 17న రానున్నట్లు ఆమె వెల్లడించారు.

మాజీ ప్రధాని ఇందిరా గాంధీ రాజకీయ జీవితం ఆధారంగా రూపొందిన సినిమా ఎమర్జెన్సీ. ఎమర్జెన్సీ నాటి పరిస్థితులను సినిమాలో ప్రముఖంగా చూపించనున్నారు. అయితే ఈ సినిమా ప్రచార చిత్రాలు విడుదలైనప్పటి నుంచే చిత్రంపై తీవ్రంగా విమర్శలు వచ్చాయి. తమ గురించి తప్పుగా చిత్రీకరించారంటూ సిక్కు వర్గాలు అభ్యంతరం తెలుపుతూ సెన్సార్‌ బోర్డుకు లేఖ కూడా వ్రాసాయి.

దీంతో, సెన్సార్‌ బోర్డు ఈ సినిమాకు సంబంధించి పలు సన్నివేశాల్లో అభ్యంతరం వ్యక్తం చేసింది. సెన్సార్‌ బోర్డులోనూ చాలా సమస్యలున్నాయని, తమ చిత్రానికి సర్టిఫికెట్‌ ఇవ్వడంలేదంటూ కంగన అసహనం వ్యక్తం చేశారు. న్యాయ పోరాటం చేసేందుకు సిద్ధమయ్యారు. 

ఈ క్రమంలోనే ఎమర్జెన్సీ విషయంలో ఓ నిర్ణయానికి రావాలంటూ బాంబే హైకోర్టు కూడా సెంట్రల్‌ బోర్డ్‌ ఆఫ్‌ ఫిల్మ్స్‌ సర్టిఫికేషన్‌ను ఆదేశించింది. ఈ క్రమంలోనే ఆ తర్వాత ఈ చిత్రానికి సెన్సార్ బోర్డు నుంచి క్లీన్ చిట్​  అక్టోబర్ 17న వచ్చింది. తమ సినిమాకు సెన్సార్​ పనులు పూర్తైనట్లు కంగన కూడా సోషల్ మీడియా వేదికగా తెలిపారు. 

తొలుత ఈ చిత్రం సెప్టెంబర్ 6న వచ్చేందుకు సిద్ధమైంది. కానీ ఆ తర్వాత కూడా పలు కోర్టు కేసులను కూడా ఎదుర్కొన్న ఈ చిత్రం ఇప్పటి వరకు వాయిదా పడుతూ వచ్చింది. మరోవైపు, ఈ సినిమా విషయంలో కంగన హత్యా బెదిరింపులు కూడా ఎదుర్కొన్నారు. కాగా, గత కొంత కాలంగా విజయానికి దూరంగా ఉన్న కంగనా రనౌత్​ ఈ ఎమర్జెన్సీ చిత్రం పైనే ఆశలు పెట్టుకున్నారు. అంతకుముందు ఓ సందర్భంలో ఈ చిత్రం గురించి ఆమె మాట్లాడుతూ తనకు సంబంధించిన ఆస్తులన్నింటినీ దీని కోసం తనఖా పెట్టినట్లు తెలిపారు. 

మొదటి షెడ్యూల్ సమయంలో అయితే డెంగీ బారినపడి రక్తకణాల సంఖ్య భారీగా పడిపోయినా, షూట్‌లో పాల్గొనాల్సి వచ్చిందని చెప్పారు. ఈ చిత్రానికి ఆమె దర్శకత్వంతో పాటు నిర్మాతగానూ వ్యవహరించారు. జయప్రకాష్‌ నారాయణ్‌ పాత్రలో అనుపమ్‌ ఖేర్‌, మాజీ ప్రధాని అటల్‌ బిహారీ వాజ్‌పేయీ పాత్రలో శ్రేయస్ తల్పడే నటించారు.