లోకాయుక్త విచారణకు హాజరైన సిద్దరామయ్య

లోకాయుక్త పోలీసులు అడిగిన అన్ని ప్రశ్నలకూ సమాధానాలు చెప్పానని సిద్ధరామయ్య పేర్కొన్నారు. విచారణ అనంతరం ఆయన మాట్లాడుతూ… ‘ప్రతీది(ముడా స్థల కేటాయింపు) న్యాయబద్ధంగా జరిగింది. బీజేపీ, జేడీఎస్‌ అబద్ధపు ఆరోపణలు చేస్తున్నాయి. లోకాయుక్త పోలీసులు అడిగిన అన్ని ప్రశ్నలకు సమాధానాలు చెప్పాను. నాపై తప్పుడు కేసు పెట్టారు. నేను నిజాలు చెప్పాను. నాపై ఉన్నవి ఆరోపణలు మాత్రమే.’ అని పేర్కొన్నారు.

మరోవంక, సీఎం పదవికి సిద్ధరామయ్య రాజీనామా చేయాలని డిమాండ్‌ చేస్తూ బుధవారం బీజేపీ నేతలు మైసూరులో ఆందోళనకు దిగారు. బీజేపీ ఎమ్మెల్యే టీఎస్‌ శ్రీవత్స నేతృత్వంలో బీజేపీ శ్రేణులు సిద్ధరామయ్య, కాంగ్రెస్‌కు వ్యతిరేకంగా ప్లకార్డులు ప్రదర్శించి, నినాదాలు చేశారు. సిద్ధరామయ్య సీఎం పదవికి రాజీనామా చేసి, విచారణను ఎదుర్కోవాలని శ్రీవత్స డిమాండ్‌ చేశారు. ఆయన సీఎంగా ఉంటే విచారణ పారదర్శకంగా ఎలా జరుగుతుందని ప్రశ్నించారు. లోకాయుక్త పోలీసుల తీరుపై అనుమానం వ్యక్తం చేసిన ఆయన ఈ కేసును సీబీఐకి అప్పగించాలని డిమాండ్‌ చేశారు.