జవాన్లకు మిఠాయి తినిపించిన ప్రధాని మోదీ

21వ శతాబ్దపు అవసరాలను దృష్టిలో ఉంచుకుని తమ ప్రభుత్వం సైన్యం, భద్రతా దళాలకు ఆధునిక వనరులను సమకూరుస్తోందని భరోసా ఇచ్చారు. ప్రపంచంలోనే అత్యంత ఆధునిక సైనిక దళాల్లో ఒకటిగా మన భారత సైన్యాన్ని నిలుపుతామని తెలిపారు. ఈ ప్రయత్నాలకు పునాది రక్షణ రంగంలో మనం సాధించిన స్వావలంబన అని పేర్కొన్నారు.  ‘‘నేడు మనం అభివృద్ధి చెందిన భారత్ లక్ష్యం దిశగా వేగంగా పయనిస్తున్నప్పుడు, మీరంతా ఈ కలను పరిరక్షిస్తున్నారు’’ అని ప్రధాని తెలిపారు.

సరిహద్దు పర్యాటకం జాతీయ భద్రతలో కీలకమైన అంశమని, దీనిని తరచుగా విస్మరిస్తున్నారని, ఈ ప్రాంతంలో కచ్ అందుకు అనువైన ప్రాంతమని ప్రధాని మోదీ తెలిపారు. సాయుధ దళాలే భారత దేశ బలమని నరేంద్ర మోదీ చెప్పారు.

‘‘ప్రపంచం మిమ్మల్ని చూసినప్పుడు భారత్ బలం కనిపిస్తుంది. మన  ప్రత్యర్ధులు మిమ్మల్ని చూసినప్పుడు, వారు వారి దురుద్దేశపూరిత ప్రణాళికలకు ముగింపును చూస్తారు. భారత్ తన సరిహద్దులలో ఒక్క అంగుళం విషయంలో కూడా రాజీపడబోదు. అందుకే మన విధానాలు మన సాయుధ దళాల సంకల్పానికి అనుగుణంగా ఉన్నాయి’’ అని ప్రధాని మోదీ భారతీయ సైనికులతో స్పష్టం చేశారు.