ప్రపంచ శాంతి, స్థిరత్వానికి భారత్​-చైనా సంబంధాలు కీలకం

‘భారత్​- చైనాల మధ్య నెలకొన్న విభేదాలు, విరోధాలు సమసిపోవడానికి ఇరుదేశాల మధ్య పరస్పర సహకారం పెంపొందాలని’ చైనా అధ్యక్షుడు జిన్‌పింగ్‌ అభిప్రాయపడ్డారు. మోదీ-  జిన్​పింగ్ మధ్య జరిగిన ఈ సమావేశంలో ఇరు దేశాల అత్యున్నతస్థాయి అధికారులు కూడా పాల్గొన్నారు.

“ప్రధాని మోదీ కజాన్‌లో మిమ్మల్ని కలవడం నాకు చాలా సంతోషంగా ఉంది. ఐదేళ్ల తర్వాత అధికారికంగా ద్వైపాక్షిక సమావేశం కావడం ఇదే తొలిసారి. మన సమావేశంపై మన రెండు దేశాలకు చెందిన వారే కాకుండా అంతర్జాతీయ సమాజం మొత్తం ఇటువైపు దృష్టిపెట్టింది. చైనా, భారత్ రెండూ పురాతన నాగరికతలు కలిగివున్న దేశాలు. అభివృద్ధి చెందుతున్న ప్రధాన దేశాలు. ఆధునికీకరణ ప్రయత్నాలలో మనం కీలక దశలో ఉన్నాం” అని చైనా అధ్యక్షుడు పేర్కొన్నారు. 

“చక్కటి ద్వైపాక్షిక సంబంధాలు రెండు దేశాలూ సరైన దిశలో కొనసాగడానికి, ప్రజల ప్రాథమిక ప్రయోజనాలకు మంచిగా ఉపయోగపడతాయి. ఇరుపక్షాలు మరింత మెరుగ్గా సంప్రదింపులు, సహకారాన్ని కలిగి ఉంటే విభేదాలను పక్కనపెట్టగలం. అభివృద్ధి ఆకాంక్షల సాధనలో ఒకరికొకరు సాయపడడం చాలా ముఖ్యం’’ అని జీ జిన్‌పింగ్ పేర్కొన్నారు.

వాస్తవాధీన రేఖ వెంబడి నాలుగేళ్లుగా కొనసాగుతున్న ఉద్రిక్తతలకు ముగింపు పలుకుతూ, కీలక గస్తీ ఒప్పందం కుదిరిన నేపథ్యంలో మోదీ- జిన్​పింగ్​ భేటీకి మరింత ప్రాధాన్యం సంతరించుకుంది. 2022 నవంబర్​లో ఇండోనేషియాలో జరిగిన జీ20 సమావేశంలో పాల్గొన్న మోదీ, జిన్​పింగ్​లు – ఓ విందులో కలిసి మాట్లాడారు. ఐదేళ్ల తర్వాత మళ్లీ ఈ ఇరువురు నేతలు రష్యాలో భేటీ అయ్యారు.