* ప్రజ్వల్‌కు లైంగిక సామర్ధ్య పరీక్షలు?

హసన్ ఎంపి ప్రజ్వల్ రేవణ్ణను జూన్ 6వ తేదీ వరకు 6 రోజులపాటు ప్రత్యేక దర్యాప్తు బృందం (సిట్) కస్టడీకి అప్పగిస్తూ బెంగళూరు కోర్టు శుక్రవారం ఆదేశాలు జారీచేసింది. హసన్‌లో మహిళలపై జరిగిన లైంగిక దాడి ఆరోపణలను దర్యాప్తు చేసేందుకు కర్నాటక ప్రభుత్వం సిట్‌ను ఏర్పాట చేసింది. శుక్రవారం మధ్యాహ్నం 42వ అదరనపు చీఫ్ మెట్రోపాలిటన్ మెజిస్ట్రేట్ (ఎసిఎంఎం) ఎదుట ప్రజ్వల్ రేవణ్ణను సిట్ హాజరుపరచగా ఉభయ పక్షాల వాదనలు విన్న తర్వాత ఆయనను సిట్ కస్టడీకి అప్పగిస్తూ న్యాయమూర్తి ఉత్తర్వులు జారీచేశారు.

గురువారం అర్ధరాత్రి దాటిన తర్వాత 12.53 గంటలకు బెంగళూరులోని కెంపెగౌడ అంతర్జాతీయ విమానాశ్రయంలో ప్రజ్వల్ రేవణ్ణను సిట్ అధికారులు అరెస్టు చేశారు. మూడు వేర్వేరు కేసులలో అరెస్టు నుంచి తప్పించుకుని జర్మనీలో తలదాచుకున్న ప్రజ్వల్ మునిచ్ నుంచి ఇక్కడకు చేరుకున్నారు.  34 రోజులుగా విదేశాల్లో తలదాచుకున్న ప్రజ్వల్ బెంగళూరు రాగా, ఐదుగురు మహిళా పోలీసులు ఆయనను హెడ్‌మూరికట్టిలోని సిట్ కార్యాలయానికి తీసుకువచ్చారు.

నగరంలోని సిఐడి ప్రధాన కార్యాలయంలగల సిట్ కార్యాలయంలో ఉన్న తాత్కాలిక సెల్‌లో రాత్రంతా గడిపిన ప్రజ్వల్‌ను ఉదయం వైద్య పరీక్షల నిమిత్తం శివాజీనగర్‌లోని బౌరింగ్ ఆసుపత్రికి తీసుకెళ్లారు.  మహిళలపై లైంగిక దాడుల ఆరోపణలు ఉండటంతో ఆయనకు లైంగిక సామర్థ్య పరీక్షలు కూడా నిర్వహించారని తెలుస్తోంది. అనంతరం మెజిస్ట్రేట్ ముందు హాజరుపరిచారు.

మరోవంక, ప్రజ్వల్ రేవణ్ణ లైంగిక వేధింపుల కేసు మలుపులు తిరుగుతోంది. మైసూరు జిల్లా కేఆర్ నగర్ నుంచి ఒక మహిళ అపహరణకు సంబంధించి ప్రజ్వల్ తల్లి భవానీ రేవణ్ణకు స్పెషల్ ఇన్వెస్టిగేషన్ టీమ్ నోటీసు పంపింది. జూన్ 1న విచారణకు హాజరుకావాలని ఆదేశించింది. కిడ్నాప్ కేసులో విచారణకు హాజరుకావాలని ఇంతకుమందు కూడా భవానీ రేవణ్ణకు ‘సిట్’ నోటీసులు పంపింది.

అయితే, ఈ కేసులో విచారణకు తాను సహకరించేందుకు సిద్ధమేనని, హోలెనర్సిపూర్‌లోని చెన్నైంబికా నివాసంలో తాను అందుబాటులో ఉంటానని సిట్‌కు ఆమె సమాచారం ఇచ్చారు.  ఈ నేపథ్యంలో సిట్ తాజా నోటీసులు పంపింది. మహిళా అధికారులతో తమ బృందం హోలెనర్సిపూర్‌కు వస్తుందని, శనివారం ఉదయం 10 గంటల నుంచి సాయంత్రం 5 వరకూ అందుబాటులో ఉండాలని ఆ నోటీసులో పేర్కొంది.