అయోధ్య సీతారాముల విగ్రహాలకు నేపాల్ కొండరాయి

 ‘శిలలను అయోధ్యకు తీసుకురావాలని నేపాల్‌కు చెందిన కొందరు పెద్దలు మమ్మల్ని అడిగారు. శిలలు అయోధ్యకు చేరుకున్న తర్వాత ఏం చేయాలో, ఎలా వాడుకోవాలో ట్రస్ట్‌ నిర్ణయిస్తుంది. ఈ రెండు శిలలు ఫిబ్రవరి 2 న అయోధ్యకు చేరుకోనున్నాయి. శాలిగ్రామి నది నుంచి సేకరించిన ఈ శిలలు అత్యంత పురాతనమైనవిగా నిపుణులు చెప్తుంటారు’ అని రామమందిర్ ట్రస్ట్ ట్రస్టీ కామేశ్వర్ చౌపాల్ తెలిపారు.

భూగర్భ శాస్త్రవేత్తలు, సాంకేతిక నిపుణులతో కూడిన బృందం పలు వారాల పాటు ఆ ప్రాంతంలో పరిశీలన జరిపి, అనువైన ఈ భారీ శిలలను గుర్తించినట్లు జానకి దేవాలయం ప్రధాన మహంత్ రామ్ తాపేశ్వర్ దాస్ తెలిపారు. ఈ నెలాఖరుకు అయోధ్యకు చేరే ఈ శిలలను తాము బహుమతిగా రామాలయంకు అందిస్తున్నామని ఆయన వెల్లడించారు. ఈ శిలలు వేలసంవత్సరాలపాటు మన్నికగా ఉంటాయని, భూకంపాలకు సహితం తట్టుకుంటాయని ఆయన చెప్పారు.

ఈ శిలలను బహుకరించడం ద్వారా భారత్ – నేపాల్ ల మధ్య ధార్మిక సంబంధాలు  బలోపేతం కాగలవని నేపాల్ కాంగ్రెస్ కేంద్ర కమిటీ సభ్యుడు బీమాలేంద్ర నిధి విశ్వాసం వ్యక్తం చేశారు. అయోధ్య రామమందిరం ఉంచడం కోసం శివధనస్సును కూడా బహుకరించాలని భావిస్తున్నట్లు ఆయన తెలిపారు.