బాబ్రీ విధ్వంసంలో నిందితులంతా నిర్దోషులే

దేశమంతా ఉత్కంఠగా ఎదురుచూసిన బాబ్రీ మసీద్ కూల్చివేత కేసులో ప్రత్యేక న్యాయస్థానం సంచలన తీర్పు వెలువరించింది. ఈ ఘటన ముందుస్తు పథకం ప్రకారం జరిగింది కాదని, పథకం ప్రకారం కూల్చివేసినట్టుగా ఆధారాలు లేవని పేర్కొంది.

లక్నోలోని ప్రత్యేక న్యాయస్థానంలోని కోర్టు రూమ్‌ నంబరు 18లో సీబీఐ జడ్జి సురేంద్ర కుమార్‌ యాదవ్‌ 2,000 పేజీల తుది తీర్పును చదివి వినిపించారు. సిబిఐ కోర్టుకు అందించిన ఆడియో, వీడియో ఆధారాల వల్ల నిందితులను దోషులేగా తేల్చలేమని కోర్టు స్పష్టం చేసింది. బాబ్రీ మసీదును కూల్చినవారు సంఘ వ్యతిరేకులని కోర్టు అభిప్రాయపడింది.

1992, డిసెంబరు 6న అయోధ్యలోని బాబ్రీ మసీదును కరసేవకులు కూల్చి వేసిన విషయం తెలిసిందే. ఈ కేసులో వాదోపవాదనల అనంతరం కోర్టు బుధవారం తీర్పును ఇచ్చింది. ఈ కేసును విచారించిన సీబీఐ  351 మంది సాక్షుల్ని న్యాయస్థానం ఎదుట ప్రవేశపెట్టింది. 600 డాక్యుమెంట్లను రుజువులుగా చూపించింది.

48 మందిపై అభియోగాలు నమోదు చేయగా, విచారణ జరుగుతుండగానే 16 మంది ప్రాణాలు కోల్పోయారు. 16వ శతాబ్దం నాటి బాబ్రీ మసీదుని కూల్చివేతలో పాల్గొన్న కరసేవకుల్ని ఈ కేసులో నిందితులందరూ కుట్ర పన్ని వారిని రెచ్చగొట్టారని సీబీఐ న్యాయస్థానం ఎదుట వాదనలు వినిపించింది. 

చివ‌రికి న్యాయ‌మే గెలిచింద‌ని ఆయ‌న  ఉత్త‌ర‌ప్ర‌దేశ్ ముఖ్య‌మంత్రి యోగీ ఆదిత్య‌నాథ్ సంతోషం వ్య‌క్తంచేశారు.  తాజా తీర్పుతో నాటి కాంగ్రెస్ ప్ర‌భుత్వాల‌ కుటిల నీతి తేల‌తెల్ల‌మైంద‌ని యోగీ విమ‌ర్శించారు. బీజేపీ నేత‌ల ప్ర‌యేమ‌మున్న ఈ కేసు విష‌యంలో కాంగ్రెస్ రాజ‌కీయ ప‌క్ష‌పాతంతో వ్య‌వ‌హ‌రించింద‌ని, ఈ కేసును అడ్డం పెట్టుకుని ఓటు బ్యాంకు రాజ‌కీయాలు చేసింద‌ని ఆయన ఆరోపించారు.