రైతులకు తప్పుదోవ పట్టిస్తున్న వివక్ష పార్టీలు 

కేంద్రం ప్రతిష్టాత్మకంగా తీసుకొచ్చిన కొత్త వ్యవసాయ బిల్లుల విషయంలో రైతులకు విపక్ష పార్టీలు అబద్ధాలు చేస్తున్నాయని ప్రధాని నరేంద్ర మోదీ ఆరోపించారు. ఈ బిల్లులకు వ్యతిరేకంగా నేడు దేశ వ్యాప్తంగా రైతులు నిరసనలు తెలపడాన్ని ప్రస్తావిస్తూ  తమ స్వలాభం కోసం రైతులను తప్పుదోవ పట్టిస్తున్నారని మండిపడ్డారు.

ఎన్డీయే ప్రభుత్వ హయాంలో రైతులను బ్యాంకులకు అనుసంధానించే ప్రక్రియను వేగవంతం చేశామని, ప్రధానమంత్రి కిసాన్ సమ్మాన్ నిధి యోజన కింద పది కోట్ల మంది రైతులకు ఒక లక్ష కోట్లకు పైగా బదిలీ చేశామని గుర్తు చేశారు. దేశంలోని రైతులకు ‘కిసాన్ క్రెడిట్ కార్డ్’ అందజేయడమే లక్ష్యంగా సాగుతున్నామని, దీంతో రైతులకు సులభ ప్రక్రియలో లోన్లు దొరికే అవకాశం ఉందని తెలిపారు. 

గత ప్రభుత్వాలు రైతులకు, కార్మికులకు ఎప్పటీకీ అర్థం కాని వాగ్దానాలను చేశాయని, క్లిష్టమైన చట్టాలను కూడా చేశాయని విమర్శించారు. కానీ తాము అధికారంలోకి వచ్చిన తర్వాత ఈ పరిస్థితులను మార్చడానికి ప్రయత్నిస్తున్నామని, రైతుల క్షేమం దృష్ట్యా విప్లవాత్మకమైన మార్పులను తెస్తున్నామని పేర్కొన్నారు. 

స్వాతంత్య్రం పొందిన తర్వాత రైతులు, కార్మికుల పేరిట అనేక నినాదాలను తీసుకొచ్చారని, మేనిఫెస్టోలను కూడా రూపొందించారని, అయితే వాటిని అమలు చేయడంలో మాత్రం పూర్తి నిర్లక్ష్యం వహించారని ధ్వజమెత్తారు. అమలుకు వచ్చే సమయానికి ఆ చట్టాలు బోలుగా ఉన్నాయని నిరూపితమయ్యాయని ప్రధాని ఎద్దేవా చేశారు.